Si ‘a paura fa nuvanta ........

Ma nui simm ‘o Napule !!!!


Aggiu liggiuto e ssentuto cca e lla ca mo è ll’Udinese a ffà paura ô Napule… Beh! Ògne lunnerí ce sta ‘na squatra ca puntualmente ce fa paura e proprio pe cchesto ‘o Napule a Milano perdette, proprio pecché scennette ‘ncampo cacato sotto… Ma i’ ‘a penzo ‘e n’ata manera e cioè penzo ca si ‘o napule joca comme sape cu dicisione e ccuraggio, allora nun ce sta nisciuna squatra ca ‘o po’ mettere paura e ca ll’ Udinese cchiú ‘e ‘nu pareggio a Nnapule nun piglia: e dico ca ‘a vera Udinese, guagliú, è cchella vista contro ô Bbari e ce sta poco ‘a averne paura:si ‘a squatra avverzaria nun s’arape Sancezzo e Di Natale nun fanno ‘o riesto ‘e niente; dummeneca ànnu fatto ‘nu gollo cu ‘nu cornerro e ttre ncontropiede, cchiú o meno ‘a stessa cosa d’ ‘o Napule, sulo ca ‘o Napole a differenza lloro cerca sempe ‘e custruí ll’azzione ‘e juoco pure cu ll’esterne e cu ‘e difenzure. Pe mme ll’unica squatra ca pure senza ffarce paura po’ ffotterce ‘o terzo posto è ‘a Roma, pecché pe qualità tène ‘ncumplesso ‘nu gruppo ‘e jucature meglio d’ ‘e nuoste soprattutto a centrocampo e pure pecchè è accumpagnata p’ ‘a mana e tène, p’ausà ‘nu franzesismo, ‘nu mazzo scassato cioè ‘na bbona sciorta ca ‘un fernesce maje; dummeneca cu ‘a Lazzio nun à fatto niente pe vvencere, ma à vinciuto; nè ce po’ fà paura ‘a Lazzio ca s’è sgunfiata e comme capacità uffenzivaè zzero spaccato. Pe mme – ponno scrivere e ddicere chello ca vonno – ll’Udinese a Nnapule ce vène p’ ‘o quarto ‘e bbullito ‘e ‘nu pareggio comme venono tutte ‘e squatre,e ppirciò ‘e che ccosa ce mettimmo paura?Si ‘o Napule fa ‘o Napule e Mmazzarri ‘ncarra ‘a formazzione e mette ‘ndifesa ‘nu marcantonio ca ‘e capa nun ne sbaglia uno(Cribari ô posto ‘e culo’echiummo), ausa a Ruizzo ca sape pruporre ll’azzione e lassa â casa a Gargano, pe ll’Udinese passa ‘a vacca e fa acqua ‘a pippa! E p’ ‘o mumento, primma ca arriva cca è ‘o Napule ca ‘a po’ spaventà! Comme? Rignenno ‘e golle ô Cagliari, â Lazzio e ô Bbologna! Chiaramente è ampressa pe parlarne, ma nun è sbagliato anticipà ca ‘o Napule nun à dda jucà scunzideratamente a ccapa sotta, ma raggiunanno e tenenno ‘a difesa ‘nzerrata cu paletto e catenaccio ermeticamente evitanno ‘e dà spazzio ê micidiali contropiedi ‘e Di Natale e Sancezzo e chiaramente cuntemporaneamente à dda luttà a centrocampo per nun mullà manco tanto ‘e turreno. Forza Napoli.

Raffaele Bracale Brak

Speriamo sia cosi.....